Les Mazcaraes d'iviernu. 2

Les mazcaraes d’iviernu son les celebraciones que se faen ente Navidá y Antroxu nes que los mozos amarútense y salen a percorrer los pueblos pidiendo l’aguilandu. 

Estes celebraciones tienen un orixe ancestral, dalgunos rellaciónenles coles fiestes romanes d’empiezu del añu pero como son apaecíes o asemeyaes a munches de por Europa paez confirmarse la so mayor antigüedá a los romanos. 

Per otru llau, el cristianismu asitió y averó dalgunes de les sos festividaes más señalaes alredor destes mazcaraes o del solsticiu d’iviernu y la llegada de la primavera, al nun poder acabar con estes fiestes y celebraciones.


 
Nel entetiempu ente Navidá y Antroxu empecipia l’añu agrariu por ello estes mazcaraes considerabánse como un ritu de camín pa favorecer l’añu nuevu que trae amás elementos asemeyaos en cuasi toles mazcaraes peninsulares y europees: lloqueros, elementos vexetales, homes solteros, pidida d’aguilandu, pelleyes, ceniza…

Güei caltiénense bien poques mazcaraes d’iviernu n’Asturies: "A Reisada" en Tormaleo (Ibias), "Os Reises" de Valledor (Allande), "el Guilandu" en La Puela (Allande) y Xedré (Cangas de Narcea), "los Sidros" en Valdesoto (Siero) y "el Guirria" de San Xuan de Beleñu (Ponga), anque sábese que enantes celebrábanse por toa Asturies: "Los Bardancos" de Casu, "Los Zamarrones" de L.lena, "aguilandos" en Quirós, Teberga, Pravia, Salas, Tinéu, "farses" na Cuenca del Nalón o "guirrios" en Bimenes....

Güei día recuperáronse "Os Reises" pol empeñu d'un garrapiellu de xente que pelea escontra la desapaición d'estas costumes. Gracies pola vuestra llabor a "Vezos Astures".