Cosadielles, Refranes, Aldivinances...

Entamamos güei con una estaya de la que falamos en clas. Pa ello preciso qu'entaméis a entrugar sobre ello o tamién en discurrir vosotros n'alguna.

¡Claru que sí!

¿Qué ye que non teneis intelixencia suficiente pa inventar o discurrir vosotros parte d'ellas?

Yo creo que sois de sobra quien a ello.

Cuando tengaes dalguna fecha...ya sabeis lo que tenes que facer.

Pídovos atención nuna cosuca: dalguna delles tan encaminaes a los escolinos de primeru y segundu, por ello, los mayores non deis la solución a elles y dedicaivos a les vuestres. Gracies.

Cosadielles

¿Qué cosa cosadiella ye una cosa que

tien la collor de l'ablana,

ablanes xinta tamién;

blincando de rama en rama, 

esguilar failo perbién?.

(Esta ye pa primeru y segundu)

Estes vinientes son pa tolos cursos:

¿Qué cosa cosadiella ye

una capiellina blanca

ensin puerta ni tranca?

 ¿Qué cosa cosadiella ye

una tabliquina 

mui atablicada

siempre ta a techu

y siempre ta moyada?

Refranes

Les vaques en castañéu y les castañes nel cestu.

Per San Mateo les ñozales apaleo

Per San Miguel la llana, la toñada y el miel.

Per Tolos Santos la ñeve pelos cantos y per San Andrés a la puerta la ves.

Setiembre ye un mes galanu pal llabraor asturianu.

Nunca llovió que nunca abocanara.

¡Que vos preste!